Otatat


Mislela san da nisan dobro čula, pa san prosila susedu da mi još jedanput reče. Ne, ne znan tu besedu, a ne bin mogla ni pogodit ča znači. Špjegala mi j' da j' neki dan pročitala va Noven liste onu žensku ka piše da ni tatica, kot ča su ju optužili, kot ča su ju... Otatali – san zajno razumela. Pomogla mi j' beseda tat, ka se j' još rabila va staroslavensken zajike, a danas se rabi i va književnen i va dijalete.
Besedu otatat nisan arivala nigdere nać, nanke pul Mohorovičića (suseda mi j' z Rukavca!) i sreća da poznan još neki Rukavčani. Prvi kega san zvala mi j' potvrdil da se ta beseda rabila, baren dokle j' on još gore živel.
Niš ne znan ča se j' potle dogajalo z onun ženskun ku su otatali. (Z naglaskon na drugen a!) Imela j' sreću da se to samo govorilo okole, da ju nisu otatali al pak osudili va novinah, aš da se ona sama ni javila, čuda od nas ne bi za to ni znalo.
Spametilo me j' to one vele krizi na početke osandeseteh, kad su bile vele nestašice sega i sačesa, i kad je jena butigerica skrila va magazine jedan paket deterdženta od pet kil, ako san dobro zapametila, pa njoj je kontrola to našla i nakon nekega vremena bila j' va đornale.
Neću nikada pozabit tu celu velu stranicu Vjesnika, koj je na samen vrhe pisalo da neki sud va Zagrebe, pa onput zdola tega z debelemi velemi slovami U IME NARODA DONOSI PRESUDU (al pak OSUĐUJE, nisan više sigurna) tu i tu žensku s te i te butigi aš je itd., itd. ... I to preko cele stranice, do samega dna!
Bilo mi j' žal te butigerice, aš je i onput bilo čuda većeh tati ki su lišo pasevali, kot i danas, a me j' strah da te i naprvo... A kontroli, komisiji al inšpekciji te se naprvo, kot i vavek, najprvo hitat na mići tati. Aš ako su krivi, oni te jedini i platit, njih je najlagje osudit, a ako nisu krivi, nete iskat da njin se plati za duševne boli, aš nimaju dosti za advokata, al KAKO bimo mi rekli za albukata.
Njih je, dunke, najlagje otatat!

Ivanka GLOGOVIĆ KLARIĆ