TE PHENAV ČAČIPEN SOM RADO ALESKE.

Maškar o Roma mek sa hin frima terne, goďaver the bachtale manuša, so sar keren peske maškarutne the bare školi, ačhen Roma a na ladžan vaš oda. Hin maškar lende manuša, so bisteren, ko hin, the peskero romipen garuven. On imar na kamen te šunel pal o romano problemos. No na sako bisterel, ko hin – peskero romipen sikhavel the maškar o gadže.

The e Ingrid Lukáčová hiňi ajsi romaňi džuvľi, so na ladžal, ko hiňi the maškar o gadže na garuvel peskro romipen. E Ingrid Lukáčová uľiľa andre fameľija, kaj o dad the e daj kerenas andre škola. Lakero dad o Gejza Adam hino šerutno pre Stredno umelecko škola Kašate. Vašode talam the leskeri čhaj e Inga kamelas te hel učiteľka. Geľa pre bari škola Nitrate pre romaňi Katedra, kaj sikhľolas učiteľkake prekal cikne čhave odbor 1. – 4. a the pal e romani kuľtura. Imar sar cikňi čhaj pes bavinelas a kamels te hel učiteľka. Lakere sune the bavišaga jekh pal aver polokes visarenas čačipnaske. Adaďives ačhel anglal čhave pal o skamind the sikhavel romaňi čhib le čhaven Kašate pre Stredno umelecko škola.